ଭୁବନେଶ୍ୱର,(ଏସ୍ଏନ୍ୟୁଜ): ପୁଣି ଫେରିଲା ଲୁଟ୍ ଟଙ୍କା । ଅସମ୍ଭବ ଏବେ ଧିରେ ଧିରେ ହେଉଛି ସମ୍ଭବ । କିଛି ଦିନ ପୂର୍ବରୁ କୁହାଯାଉଥିବା ଅସମ୍ଭବ କାର୍ଯ୍ୟ ଏବେ ଧିରେ ଧିରେ ସମ୍ଭବ ହେଲାଣି । ସାଇବର ଠକେଇ ଦ୍ୱାରା ଲୁଟ୍ ହୋଇଥିବା ଟଙ୍କାକୁ ଫେରି ପାଉଛି ପୋଲିସ। ଆଉ ଏହି ଟଙ୍କା ଯାହାର ତାକୁ ଫେରାଇ ଦିଆଯାଉଛି।
ଏମିତି ଏକ ଖବର ପୁଣି ସାମ୍ନାକୁ ଆସିଛି। କ୍ରାଇମ୍ ବ୍ରାଞ୍ଚ, ଓଡ଼ିଶା ପୋଲିସ ନିଜ ଟ୍ୱିଟ୍ ହ୍ୟାଣ୍ଡେଲରେ ଏନେଇ ସୂଚନା ଦେଇଛି। ଗୋଟିଏ ନୁହେଁ ଏକ କକାଳୀନ ତିନୋଟି ସାଇବର ଠକେଇ ଘଟଣାରେ ପୋଲିସକୁ ସଫଳତା ମିଳିଛି। ଗତ କିଛି ଦିନ ପୂର୍ବରୁ କଟକ ନୂଆ ବଜାରର ବିଷ୍ଣୁପ୍ରସାଦଙ୍କ ସହ ସାଇବର ଠକେଇ ହୋଇଥିଲା। ସେ ତାଙ୍କ ଟଙ୍କା ଏବେ ଫେରି ପାଇଛନ୍ତି। ପ୍ରାୟ ୧ ଲକ୍ଷ ୯୪ ହଜାର ଟଙ୍କା ସେ ଫେରିପାଇଥିବା ଟ୍ୱିଟ୍ ଯୋଗେ ସୂଚନା ଦେଇଛି କ୍ରାଇମ୍ ବ୍ରାଞ୍ଚ, ଓଡ଼ିଶା ପୋଲିସ।
ଏହା ସହ ପୁରୀ ଅଞ୍ଚଳର ବିବୁନା କୁମାର ଗିରିଙ୍କ ସହ ମଧ୍ୟ କିଛି ଦିନ ପୂର୍ବେ ସାଇବର ଠକେଇ ହୋଇଥିଲା ଏବଂ ତାଙ୍କ ଆକାଉଣ୍ଟରୁ ମଧ୍ୟ ଟଙ୍କା ଗାୟବ ହୋଇଥିଲା। ତେବେ ସେ ମଧ୍ୟ ୧୮ ହଜାର ୯୯୦ ଟଙ୍କା ଫେରି ପାଇଛନ୍ତି। ତାଙ୍କ ଆକାଉଣ୍ଟରୁ ୨୨, ୪୯୦ ଟଙ୍କାର ଠକେଇ ହୋଇଥିଲା।
ଆଉ ଗୋଟିଏ ମାମଲା ହେଉଛି ସେହି କଟକ ଅଞ୍ଚଳର । ମାଲଗୋଦାମ ଅଞ୍ଚଳର ସୂର୍ଯ୍ୟନାରାୟଣ ମହାନ୍ତିଙ୍କ ଆକାଉଣ୍ଟରୁ ଟଙ୍କା ଗାୟବ ହୋଇଥିଲା । ସେ ମଧ୍ୟ ତାଙ୍କର ପୁରା ଟଙ୍କା ଫେରି ପାଇଛନ୍ତି । ସୂର୍ଯ୍ୟନାରାୟଣଙ୍କ ଆକାଉଣ୍ଟରୁ ୫୩ ହଜାର ୬୬୨ ଟଙ୍କା ଲୁଟ୍ ହୋଇଥିବା ବେଳେ ସେ ପୁରା ଟଙ୍କା ଫେରି ପାଇଛନ୍ତି ।
ତେବେ ଏନେଇ ପୋଲିସ କହିଛି ଯେ, ସାଇବର ସେଲ ତୁରନ୍ତ ସୂଚନା ପାଇବା ସହ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିବାରୁ ଏହି ଠକେଇ ଗୁଡ଼ିକୁ ଧରାଯାଇପାରିଛି । ଲୋକଙ୍କ ଟଙ୍କା ଲୋକେ ଫେରିପାଇଛନ୍ତି ।
