କ୍ରାଇମବ୍ରାଂଚକୁ ହାଇକୋର୍ଟଙ୍କ ନିର୍ଦ୍ଦେଶ: ଯଥାଶୀଘ୍ର ତଦନ୍ତ ସାର

ଆଦିତ୍ୟ ଦାଶ ମୃତ୍ୟୁ ମାମଲା

ଭୁବନେଶ୍ୱର,(ଏସ୍‌ଏନ୍ୟୁଜ):ସସପେନ୍ସରେ ସମାଜସେବୀ ଆଦିତ୍ୟ ଦାଶଙ୍କ ମୃତ୍ୟୁ ମାମଲା । ଆଦିତ୍ୟ ମଲେ କେମିତି ? ହତ୍ୟା ନା ଆତ୍ମହତ୍ୟା । ପ୍ରଥମେ ଜିଆରପି ତଦନ୍ତରୁ କୌଣସି ଠୋସ୍ ପ୍ରମାଣ ମିଳିନଥିଲା । ପରେ ଆରମ୍ଭ ହୋଇଥିଲା କ୍ରାଇମବ୍ରାଞ୍ଚ ତଦନ୍ତ ଯାହା ଏବେ ଜାରି ରହିଛି । ଆଉ କ୍ରାଇମବ୍ରାଞ୍ଚ ତଦନ୍ତ ଉପରେ ଆସ୍ଥା ପ୍ରକଟ ନକରି ଆଦିତ୍ୟଙ୍କ ପତ୍ନୀ ବିଦ୍ୟାଶ୍ରୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଆବେଦନ କରିଥିଲେ ମାମଲାର ହେଉ ସିବିଆଇ ତଦନ୍ତ । ଏହା ଉପରେ ଆଜି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି ।

ଯଥାଶୀଘ୍ର ତଦନ୍ତ ସାରି ହାଇକୋର୍ଟରେ ତଦନ୍ତ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି । ହାଇକୋର୍ଟ କ୍ରାଇମବ୍ରାଞ୍ଚକୁ ଦେଇଥିବା ନିର୍ଦ୍ଦେଶ ନେଇ ବିଦ୍ୟାଶ୍ରୀଙ୍କ ଓକିଲ ସୂଚନା ଦେଇଛନ୍ତି । ଗତ ୨୭ ତାରିଖରେ ଆଦିତ୍ୟଙ୍କ ପତ୍ନୀ ବିଦ୍ୟାଶ୍ରୀଙ୍କ ଲାଏ ଡିଟେକ୍ସନ୍ ଟେଷ୍ଟ କରିଥିଲା କ୍ରାଇମବ୍ରାଞ୍ଚ । ବିଦ୍ୟାଶ୍ରୀଙ୍କ ସହ ଆଦିତ୍ୟଙ୍କ ୨ ସାଙ୍ଗ ବିକାଶ, ପପୁ ଓ ଦୀପକଙ୍କ ପଲିଗ୍ରାଫ ଟେଷ୍ଟ କରାଯାଇଥିଲା । ଏହା ପରେ ପରେ ଆଦିତ୍ୟଙ୍କ ମୃତ୍ୟୁର ସିବିଆଇ ତଦନ୍ତ ଦାବି କରି ବିଦ୍ୟାଶ୍ରୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।ଇତି ମଧ୍ୟରେ ରାଜ୍ୟ ଫରେନ୍ସିକ୍ ସାଇନ୍ସ ଲ୍ୟାବରେ ହୋଇଥିବା ଲାଏ ଡିଟେକ୍ସନ୍ ଟେଷ୍ଟ ରିପୋର୍ଟ କ୍ରାଇମବ୍ରାଞ୍ଚକୁ ମିଳିଛି । ସେପ୍ଟେମ୍ବର ୯ ତାରିଖରେ କ୍ରାଇମବ୍ରାଞ୍ଚ ଦେଇଥିବା ସୂଚନା ଅନୁସାରେ ସମସ୍ତେ ସତ କହିଛନ୍ତି । ବିଦ୍ୟାଶ୍ରୀ, ପପୁ, ବିକାଶ ଓ ଦୀପକ ସମସ୍ତଙ୍କ ପୂର୍ବ ଓ ପର ବୟାନରେ ତାଳମେଳ ରହିଛି । ଏଭଳି ସ୍ଥିତିରେ ତଦନ୍ତର ନୂଆ ଦିଗ ହେଉଛନ୍ତି ଆଦିତ୍ୟଙ୍କ ପ୍ରେମିକା ଚିନ୍ମୟୀ ମହାପାତ୍ର । ତେବେ, ଅପେକ୍ଷା କ୍ରାଇମବ୍ରାଞ୍ଚ ହାଇକୋର୍ଟରେ କେବେ ତଦନ୍ତ ରିପୋର୍ଟ ଦାଖଲ କରୁଛି ଆଉ କୋର୍ଟ କଣ ନିର୍ଦ୍ଦେଶ ଦେଉଛନ୍ତି ।

Leave A Reply

Your email address will not be published.