୧୪ ସେପ୍ଟେମ୍ବରରୁ ୧ ଅକ୍ଟୋବର ଯାଏ ସଂସଦର ମୌସୁମୀ ଅଧିବେଶନ ହେବା ସମ୍ଭାବନା

ନୂଆଦିଲ୍ଲୀ: କରୋନାକାଳ ମଧ୍ୟରେ ସଂସଦର ମୌସୁମୀ ଅଧିବେଶନ ବସିବାକୁ ଯାଉଛି । ସଂସଦୀୟ ବ୍ୟାପାର କ୍ୟାବିନେଟ ସମିତି ସଂସଦ ମୌସୁମୀ ଅଧିବେଶନ ହେବାନେଇ ସୁପାରିଶ କରିଥିବା ସୂଚନା ମିଳିଛି । ଏହା ସେପ୍‌ଟେମ୍ବର ୧୪ରୁ ଅକ୍ଟୋବର ୧ ଯାଏଁ ଅଧିବେଶନ ହେବାପାଇଁ ସମ୍ଭାବନା ଅଛି । ସୁପାରିସ୍‌ ଅନୁଯାୟୀ ୧୮ଟି ବୈଠକ ହେବ ।

କରୋନା ସଂକ୍ରମଣ ଭିତରେ ସଂସଦ ମୌସୁମୀ ଅଧିବେଶନ ବସିବା ନେଇ ପ୍ରସ୍ତୁତି ଚାଲିଛି । ଯେଉଁଥିରେ କରୋନା ସଂକ୍ରମଣକୁ ଦେଖି କେତେକ ପଦକ୍ଷେପ ନିଆଯାଇଛି । ଲୋକସଭା ଓ ରାଜ୍ୟସଭାରେ ଲୋକଙ୍କ ବସିବାକୁ ଥିବା ଗ୍ୟାଲେରୀକୁ ସଦସ୍ୟଙ୍କ ଲାଗି ବ୍ୟବହାର କରାଯିବ । ସାମାଜିକ ଦୂରତା ରକ୍ଷା ପାଇଁ ସଦସ୍ୟମାନେ ନିର୍ଦ୍ଧାରିତ ଦୂରତାରେ ବସିବେ । ରାଜ୍ୟସଭା ସଚିବାଳୟ ଅନୁସାରେ, ସଦସ୍ୟମାନେ ଅଧିବେଶନ ସମୟରେ ଗୃହ ଓ ଗ୍ୟାଲେରୀ ଉଭୟରେ ବସିବେ ।

୧୯୫୨ ମସିହା ପରେ ଭାରତୀୟ ସଂସଦ ଇତିହାସରେ ପ୍ରଥମ ଥର ପାଇଁ ଏମିତି ବ୍ୟବସ୍ଥା କରାଯାଉଛି । ଯେଉଁଠି ୬୦ ସଦସ୍ୟ ଗୃହରେ, ୫୧ ସଦସ୍ୟ ଗ୍ୟାଲେରୀରେ ଓ ଅବଶିଷ୍ଟ ୧୩୨ ସଦସ୍ୟ ଲୋକସଭା କକ୍ଷରେ ବସିବେ । ଲୋକସଭା ସଚିବାଳୟ ପକ୍ଷରୁ ସଦସ୍ୟମାନେ ବସିବା ପାଇଁ ସମାନ ଧରଣର ବ୍ୟବସ୍ଥା କରାଯାଉଛି । ପ୍ରଥମ ଥର ଗ୍ୟାଲେରୀରେ ବସିବା ବ୍ୟବସ୍ଥା ସହ, ବିଶୋଧନ, ଉଭୟ ଗୃହ ମଧ୍ୟରେ ବିଶେଷ କେବୁଲ ବ୍ୟବହାର ଓ ବଡ଼ ସ୍କ୍ରିନ୍‌ ଲଗାଯିବ ।

ତେବେ, ଅଧିବଶନ ସମୟରେ କରୋନା ମହାମାରୀ ପାଇଁ କାଗଜପତ୍ରର ବ୍ୟବହାର ହେବ ନାହିଁ । ସାଂସଦମାନେ ଡିଜିଟାଲ କପି ଦିଆଯିବ ବୋଲି ଲୋକସଭା ସଚିବାଳୟ ପକ୍ଷରୁ କୁହାଯାଇଛି । ସଦସ୍ୟଙ୍କୁ ସରକାରଙ୍କ ପ୍ରତିଟି ଅଧ୍ୟାଦେଶର ଡିଜିଟାଲ କପି ଦିଆଯିବ । କହିବାକୁ ଗଲେ ଏଥରର ମୌସୁମୀ ଅଧିବେଶନ ନୂଆ ରୂପରେଖରେ ଅନୁଷ୍ଠିତ ହେବ ।

Leave A Reply

Your email address will not be published.